Për të promovuar ushqimet tradicionale, shumë gra të nacionaliteteve të ndryshme ekspozuan gatimet e tyre, në një panair që u mbajtë sot në shtëpinë e kulturës në Kamenicë.
Panairin e hapi kryetari i Komunës z. Begzad Sinani, i cili iu bëri thirrje qytetarëve që të konsumojnë më tepër ushqime të shëndetshme tradicionale.
“E vlerësoj lartë iniciativën e OJQ “Fortesa”, e cila po bënë një punë të mirë në kultivimin e vlerave të ndryshme në Kamenicë. Këtu po shoh llojllojshmëri të ushqimeve të shëndetshme tradicionale, të cilat bëjë thirrje që të konsumohen më tepër nga njerëzit.
Komuna do të ofrojë mbështetjen e vet në të tilla organizime, por edhe në mbështetje të grave në iniciativat e tyre”, theksoi Sinani. Ai tha se ka marrë vendim që nga 1 janari të kursehet maksimalisht nga zyrtarët komunalë.
“Kam vendos që, që nga 1 janari reprezentacioni për zyrtarët komunale të jetë zero. Nga kryetari e deri tek punëtori më i thjeshtë, të kursehet maksimalisht. Dicka nga këto kursime, do të mund të shkonte në të tilla iniciativa si kjo sot”, u shpreh ai.
Nënkryetari i Novobërdës, Bajrush Ymeri, i cili ishte pjesëmarrës në panair, ka inkurajuar gratë dhe vajzat e Novobërdës e Kamenicës, të qasen më shumë në këtë drejtim dhe të krijojnë të ardhura nga gatimet e tyre. “Në Novobërdë, kemi fillu këtë iniciativë qysh më herët dhe ka rezultuar e suksesshme. Gratë janë ndarë të kënaqura, sepse kanë kriju të ardhura. Inkurajoj edhe gratë e vajzat e Kameënicës”, ka thënë Ymeri.
Ndërsa, Sanije Jahiri udhëheqëse e projektit të mbështetur nga Ambasada Holandeze, tha se gratë kanë potencial dhe kapacitet, vecse iu duhet mbështetje institucionale dhe nga organizatat e huaja në iniciativat e tyre.
