Krijohet materiali më i paprekshëm ndaj ujit në histori (Video)

Shkencëtarët në mbarë botën vazhdimisht punojnë në projekte që duken të çuditshme në shikim të parë, por shpesh herë këto projekte kanë aplikime praktike të tjera. Një grup i studiuesve në SHBA kanë qenë duke punuar në krijimin e materialeve të papërshkueshme nga uji. Një nga materialet më të papërshkueshëm nga uji në natyrë është fleta e zambakut të ujit dhe studiuesit në SHBA thonë se ata e kanë tejkaluar këtë material.

Shkencëtarët nga Instituti i Teknologjisë në Masaçusets (MIT) me anë të nanoteknologjisë kanë krijuar materialin më të papërshkueshëm nga uji. Materiali i ri i krijuar në MIT është quajtur “Super-hidrofobik.” Materiali ka aplikime interesante duke filluar me mbrojtjen e motorëve të avionëve nga ngrirja dhe mbrojtjen e rrobave nga uji.

Për të krijuar materialin, shkencëtarët kanë shtuar zhubra të vogla në një sipërfaqe të bërë nga silici. Zhubrat e vogla e bëjnë ujin të dalë jashtë sipërfaqes 40% më shpejt se në materialet e mëparshme. Shkencëtarët thonë se zhubra të ngjashme janë gjetur në natyrë në krahët e fluturës Morfo dhe në gjethe të bimëve të ndryshme.

Duke aplikuar modelin e mprehtë në sipërfaqet artificiale si metali, pëlhurat dhe sendet qeramike, Shkencëtarët shpresojnë të krijojnë produkte që do ti bëjnë ballë lagështisë.