Derisa Karaqeva po lufton me të gjitha mjetet institucionale për ta zgjidhur këtë problem, Zahirajt tashmë kanë humbur shpresat sepse atje ka mbetur vetëm një familje.
Selver Lenjani i cili me të drejtë mund të quhet si heroi i vitit 2013, nuk është ndalur asnjëherë që problemi i Karaqevës të sensibilizohet dejtë.”Unë dhe banorët e Karaqevës nuk jemi ndalur asnjëherë së vepruari sepse e drejta është në anën tonë. Toka e Kosovës do të jetë e jona dhe nuk do t`i falet Serbisë me asnjë çmim” tha Lenjani.
Lenjani tha për rajonipress se ende nuk e ka të qartë heshtjen e njerëzve kryesor të shtetit duke filluar nga presidentja, kryeministri e kryeparlamentari. “Unë e kam thënë edhe më herët se Karaqeva nuk është problem lokal, siç po mendojnë disa në kabinetet e Prishtinës. Këtu bëhet fjalë për qindra hektar tokë që i është gllabëruar padrejtësisht Kosovës” tha Lenjani.
“Asnjëherë nuk kam arritur ta kuptojë heshtjen e institucioneve qendrore karshi këtij shqetësimi të madh që kanë shfaqur me qindra herë banorët e rrezikuar dhe të frikësuar nga tytat e automatikëve të ushtrisë e xhandarmërisë serbe. Ne kemi jetuar nën ngjyrat e serbëve të maskuar që hynin natë e ditë në Kosovë dhe maltretonin banorët” sqaron Lenjani.
Lenjani mendon se viti 2013 ka qen vit i rëndë për Karaqevën dhe po hyhet në vitin 2014 sërish me të njëjtat probleme e telashe. “Ishim në luftë të përditshme me xhandarmërinë serbe dhe nuk u dorëzuam përballë saj. Provokimet e vazhdueshme që ajo bënë fusin pasiguri tek banorët” mendon Lenjani.
Situata ndërkaq duket krejt ndryshe në lagjen e Zahirajve. Rexhep Tahiri thotë se është betuar që mos ta braktisë fshatin, por duke parë injorancën e liderëve politikë, ai tashmë është kthyer në Gjilan me tërë familjen
Tahiri thotë se Zahirajt janë një vend i pasur me xehe dhe minerale dhe Serbia nuk dëshiron ta lëshojë për asnjë çmim, përderisa institucionet kosovare po shtyhen se kush po bëhet kampion i hajnisë. “Kjo vërtet është për tu shqetësuar sepse pa Zahirajn vija administrative e Kosovës pëson ndryshime radikale”shprehet ai.
Lagja e Zahirajve para luftës ka pasur 10 shtëpi, kurse tani jetojnë vetëm pesë familje. Problemin kryesor ata e kanë se rreth 150 hektar tokë u ka mbetur përgjithmonë në pjesën e Serbisë, kurse shtëpitë e tyre ende figurojnë në hartat e KFOR-it dhe hartat serbe si pjesë të Preshevës. /rajonipress/
