Marrëveshja është nënshkruar të martën nga ministri i Financave (MF), Besim Beqaj dhe zëvendëspresidenti i Fondit për Zhvillim të Mbretërisë së Arabisë Saudite, Mohammed A. Al-jenaidel.
Ministri Besim Beqaj ka deklaruar se nënshkrimi i kësaj marrëveshje është jashtëzakonisht i rëndësishëm për shkak se shënon fillimin e marrëdhënieve konkrete në mes të dy vendeve tona duke nënshkruar marrëveshjen për financim të përbashkët në mes të Fondit Saudit për Zhvillim, OFID-it dhe Bankës Islamike për Zhvillim dhe Republikës së Kosovës për financimin e rrugës M2 në drejtim të Mitrovicës. “Rruga M2 në drejtim të Mitrovicës ka një rëndësi të veçantë për shkak se nevoja për zhvillim ekonomik dhe lidhja e këtyre qyteteve është shumë e rëndësishme për të ardhmen ekonomike të vendit, por edhe për të ardhmen politike të Republikës së Kosovës”, ka deklaruar Beqaj, duke shtuar se ky është projekti i parë.
“Besojmë se do të pasojnë edhe më shumë projekte të tjera në vijim. Deri më tani kemi gatishmërinë për projektet, të cilat janë në fushën e shëndetësisë dhe do t’i trajtojmë gjatë vitit 2014 të gjitha këto me potencialin tonë maksimal”, ka thënë ai.
Beqaj ka deklaruar se marrëveshjen e sheh si një derë të re të bashkëpunimit, e cila do të mbetet gjatë e hapur. “Bashkëpunimi ynë me institucionet financiare ndërkombëtare, qoftë nga vendet e Perëndimit, qoftë edhe nga vendet e Lindjes së Mesme, është i mirëpritur në Republikën e Kosovës dhe këto na mundësojnë që së bashku ta bëjmë një zhvillim ekonomik për Republikën e Kosovës, për qytetarët e saj, por edhe t’i promovojmë marrëdhëniet ekonomike ndërmjet shteteve tona, në këtë rast me Arabinë Saudite”, është shprehur Beqaj.
Kurse zëvendëskryetari i Fondit për Zhvillim të Mbretërisë së Arabisë Saudite, Yousef Al-Bassam, ka thënë se nënshkrimi i kësaj marrëveshje është një provë e fuqishme dhe e gjallë e zotimit për bashkëpunim. “Presim ditën kur do të bashkohemi në rastin e përurimit dhe inaugurimit të këtij projekti të rëndësishëm rrugor.
Fondi Saudit për Zhvillim është i vetëdijshëm për problemet dhe nevojat zhvillimore në shumicën e vendeve të reja në Evropë, siç është Kosova në këtë rast”, ka theksuar ai, duke shtuar se Fondi Saudit është shumë i interesuar ta thellojë bashkëpunimin e tij në Kosovë dhe të bëjë çfarë është e mundur për të ndihmuar në implementimin e projekteve zhvillimore në sektorët e ndryshëm të ekonomisë së Kosovës.
Huaja prej 16 milionë dollarësh do të fillojë të kthehet në gusht të vitit 2018 dhe do të përfundojë në shkurt të vitit 2033.
